الەم ءالى ۇرەي قۇشاعىندا. سيريا مەن يراك جەرىندە ازاماتتىق سوعىس ءجۇرىپ جاتىر. تىنىشتىق جوق.  ساناسى ۋلانعان سودىرلار ادام بالاسىنىڭ قانىن سۋداي اعىزۋدا. لاڭكەستىك ارەكەتتەن قۇربان بولعانداردىڭ جازىعى جوق، ارينە. ءبىراق سودىرلاردىڭ سالعان سويقانىنان ادامزات قاشان قۇتىلادى؟ بۇل جالپى الەم ءۇشىن الاڭدايتىن جاعدايعا اينالىپ وتىر. ۇرەي بار.

وسى اپتانىڭ باسىندا اقش-تىڭ National Interest باسىلىمى دايش سودىرلارىنىڭ قۇربانىنا اينالاتىن كەلەسى ەلدى اتادى. ول قانداي مەملەكەت؟  باسىلىمنىڭ جازۋىنا قاراعاندا، يوردانيا ەلى سودىرلار شابۋىل جاسايتىن  كەلەسى ەلگە اينالماق. مۇنىڭ سەبەبى نەدە؟ نەگە باسقا ەمەس، يوردانيا اتالىپ وتىر؟ ساراپشىلاردىڭ سوزىنە نازار اۋدارساق، دايش لاڭكەستەرىنە قاتىستى ءقازىر يوردانيا بيلىگى وتە قاتال ساياسات ۇستانىپ وتىر. ونىڭ ۇستىنە قازىرگى كەزدە سيريا مەن يراك ايماعىندا يوردانيانىڭ ءۇش مىڭنان استام ادامى سوعىسىپ ءجۇر. ال ولار ەلگە ورالسا، قازىرگى بيلىك ەشكىمدى كەشىرمەيدى. سوتتايدى، اتۋ جازاسىنا كەسەدى. بۇل ءبىر. ەكىنشىدەن، قازىرگى كەزدە ەلدە الەۋمەتتىك-ەكونوميكالىق جاعداي وتە اۋىر. جۇمىسسىزدىق كوپ. بيلىكتىڭ باسقارۋى ءالسىز. ءدىني ەكسترەميستىك ۇيىمداردىڭ بەلسەندىلىگى ارتىپ بارادى. مۇنداي جاعدايدى لاڭكەستەر ءتيىمدى پايدالانۋى يۇمكىن.

كەيىنگى كەزدە يراك جەرىندە سوعىسىپ جاتقان سودىرلار دا جەڭىلىسكە ۇشىرادى. سوندىقتان ولاردىڭ بارار جەرى، باسار تاۋى جوق، امالدىڭ جوعىنان ولار ەلگە ورالادى. مۇنداي جاعدايدا لاڭكەستەر مەملەكەتتىڭ قاۋىپسىزدىگىنە وراسان زور ءقاۋىپ تۋدىرادى.

قازىرگى تاڭدا يوردانيادا شامامەن 9،5 ميلليون ادام تۇرادى. ال سيريا جەرىنەن قاشقان بوسقىنداردىڭ سانى 658 مىڭ شاماسىندا. ولاردىڭ دا جاعدايى ءماز ەمەس. سوندىقتان ولار دا اقشاعا جالدانىپ، سودىرلاردىڭ ساپىنا قوسىلىپ كەتۋى ىقتيمال.

2018 جىلدان باستاپ، يوردانيا ايماعىندا ءدىني ەكسترەميزيم مەن لاڭككەستىك ارەكەتتەر ءورشىپ، ءقاۋىپ كۇشەيىپ كەلەدى. 2018  جىلدىڭ تامىز ايىندا تەراكتىنىڭ سالدارىنان ءتورت اسكەري ادام قازا تاۋىپ، 16 تۇرعىن جارالاندى. كەيىننەن بەس سودىر ۇستالدى. ولار تۇراتىن پاتەردەن ءارتۇرلى جارىلعىش زاتتار تابىلعان.

ءقازىر يوردانيادا بارلىق قاۋىپسىزدىك شارالارى جاسالىپ جاتىر. ءبىراق لاڭكەستەر ويلاماعان جەردەن شابۋىل جاسايدى عوي. دەمەك، مۇنداي وقىس وقيعا مەن ارەكەتتىڭ الدىن العان دا  دۇرىس.